Տպագրվում է ըստ Տ. նավասարդյանցի «Հայ ժողովրդական հեքիաթների» V գրքույկում հրատարակված բնագրի (Տ. Նավասարդյանց, Հայ ժողովրդական հեքիաթներ, V գիրք, Տփխիս, 1889, էջ 32—35)։ Հեքիաթի տողատակին գրված է հետևյալ ծանոթությունը, «Սույն գրքի մեջ հրատարակում ենք պ. Հմայակ Մաժինյանի մեզ ուղարկած հետևյալ յոթ հեքիաթները, որ պարոնը ժողովել է Շնող գյուղում (Լոռու նահանգում) և գրել բուն տեղական բարբառով։ Հրապարակավ մեր շնորհակալիքն ենք հայտնում պարոնին, որ լավ ըմբռնելով հայ ժողովրդի բանավոր գրականության ուսումնասիրության կարևորությունը, նպաստում է մեզ՝ մեր սկսած ձեռնարկության մեջ»։ Հաշվի առնելով գրքի տպագրության ժամանակը, պետք է ենթադրել, որ Հմ. Մաժինյանը Լոռու այս հեքիաթները պետք է գրի առած լինի 1880—1888 թթ. ընկած ժամանակամիջոցում։ Հեքիաթասացի և հեքիաթի գրառման հանգամանքների մասին այլ տեղեկություն չկա։